Os nacionalistas presentan en Xove unha moción para
concretar un verdadeiro servizo de oncoloxía no Hospital da Costa
Os concelleiros do BNG
criticaron as iniciativas que o PP leva ultimamente ao pleno cualificándoas de
“xeralidades” coas que pretenden enganar a opinión pública “dicindo que van
facer, pero sen concretar prazos nin orzamento ningún”
No
pasado pleno ordinario do 07/10/2013 o grupo municipal popular presentou en
Xove unha moción tipo que se correspondía cunha campaña dirixida dende a
dirección provincial do PP para instar en todos os concellos da Mariña unha
iniciativa relativa á atención e tratamento de pacientes oncolóxicos. Esta
iniciativa naceu unha vez máis para tentar desviar a atención cidadá tras ditaren
na Xunta o Decreto de Xestión Integrada que deriva á capital da provincia as
competencias de xestión das áreas sanitarias de Monforte e A Mariña.
 |
| EQUIPO DE RADIOTERAPIA |
Aínda
así, e a pesar de sermos conscientes os concelleiros nacionalistas de estarmos
asistindo de novo a unha campaña de propaganda tras os continuos recortes
orzamentarios no eido sanitario e a perda en Xove dunha praza de facultativo, a
moción do PP foi aprobada por unanimidade.
Nese
mesmo debate plenario, desde o BNG presentamos unha proposta de resolución de
engadido respecto á moción do PP por considerar que a proposta de acordo non
concretaba de xeito claro o compromiso da corporación municipal de Xove cos
doentes oncolóxicos. O alcalde-presidente respondeu literalmente, tal e como consta
reflectido na acta, que: “a proposta de engadido é de tal magnitude que
sería mellor que se plantexara como unha moción independente”.
Por esta
razón, o concelleiro-portavoz do grupo municipal nacionalista accedeu á
petición da alcaldía e é por iso que, coa intención de concretar esta
iniciativa dun servizo de oncoloxía no Hospital de Burela e para non xogar coa
sensibilidade da cidadanía nunha doenza tan grave coma o cancro, solicitamos do pleno da corporación municipal a adopción do seguinte acordo:
1.- Instar a Xunta de Galiza para a creación na
Mariña dun Hospital Oncolóxico de Día coa dotación de medios persoais e
materiais, e mais dun espazo físico que permita a atención integral dos
doentes. Tamén se estabelecerá unha Unidade de Coidados Paliativos e
Hospitalización a Domicilio con recursos humanos, materiais e parque móbil
suficiente que permita atender a veciñanza de todos os concellos da área
sanitaria da Mariña.
2.-
Reclamar da Xunta de Galiza a posta en funcionamento do Servizo de Radioterapia
no HULA (Hospital Universitario Lucus Augusti) e así evitar desprazamentos a
outras provincias.
3.-
Dar traslado deste acordo ao presidente da Xunta e aos
portavoces de todos os grupos políticos do Parlamento galego.